maiṅ jab bhī akelī hotī hūṇ, tum chupke se ā jāte ho
aur jhāṇk ke merī āṇkhoṅ meṅ, bīte din yād dilāte ho
bīte din yād dilāte ho
mastānā havā ke jhoṇkoṅ se har bār vo parde kā hilnā
parde ko pakaṛne kī dhun meṅ do ajanbī hāthoṅ kā milnā
āṇkhoṅ meṅ dhuāṇ sā chhā jānā sāṇsoṅ meṅ sitāre se khilnā
bīte din yād dilāte ho, bīte din yād dilāte ho
muṛ-muṛ ke tumhārā raste meṅ taknā vo mujhe jāte-jāte
aur merā ṭhiṭhak kar ruk jānā chilman ke qarīb āte-āte
nazroṅ kā taras kar rah jānā ek aur jhalak pāte-pāte
bīte din yād dilāte ho, bīte din yād dilāte ho
bāloṅ ko sukhāne ke khātir koṭhe pe vo merā ā jānā
aur tumko muqābil pāte hī kuchh śharmānā kuchh balkhānā
hamsāyoṅ ke ḍar se katrānā, ghar vāloṅ ke ḍar se ghabrānā
bīte din yād dilāte ho, bīte din yād dilāte ho
barsāt ke bhīge mausam meṅ, sardī kī ṭhiṭhurtī rātoṅ meṅ
pahroṅ vo yūṇ hī baiṭhe rahnā hāthoṅ ko pakaṛkar hāthoṅ meṅ
aur laṅbī laṅbī ghaṛiyoṅ kā kaṭ jānā bātoṅ bātoṅ meṅ
bīte din yād dilāte ho, bīte din yād dilāte ho
ro-ro ke tumheṅ khat likhtī hūṇ
ro-ro ke tumheṅ khat likhtī hūṇ aur khud paṛhkar ro letī hūṇ
hālāt ke tapte tūfāṅ meṅ jazbāt kī kaśhtī khetī hūṇ
kaise ho? kahāṇ ho? kuchh to kaho, maiṅ tum ko sadāeṅ detī hūṇ
maiṅ jab bhī akelī hotī hūṇ
maiṅ jab bhī akelī hotī hūṇ, tum chupke se ā jāte ho
aur jhāṇk ke merī āṇkhoṅ meṅ, bīte din yād dilāte ho
bīte din yād dilāte ho