Hai duaa yaad magar harf-e-duaa yaad naheen

prelude
dil kī choṭoṅ ne kabhī chain se rahne na diyā
jab chalī sard havā maiṅne tujhe yād kiyā
pūchhne āte ho har roz asīroṅ ke mizāj
k‌yūṇ nahīṅ kahte ho jāo tumheṅ āzād kiyā

hai duā yād magar harf-e-duā yād nahīṅ
mere nagmāt ko aṅdāz-e-navā yād nahīṅ

ziṅdgī zabr-e-muslasal kī tarah kāṭī hai
jāne kis jurm kī kāṭī hai sazā yād nahīṅ

sirf dhuṇdhlāye sitāroṅ kī chamak dekhī hai
kab huā kaun huā mujhse khafā yād nahīṅ

āo ek sajdā kareṅ ālam-e-madhośhī meṅ
log kahte haiṅ 'sāgar' ko khudā yād nahīṅ