Haan, maine bhee pyaar kiyaa, pyaar se kab inkaar kiyaa

hāṇ, maine bhī pyār kiyā
pyār se kab inkār kiyā
bhīgī bhīgī rāte, mīṭhī mīṭhī bāteṅ
aur maine dil ko nisār kiyā

pyār kiyā kaliyoṅ ke mahakte aṅgoṅ se
pyār kiyā maine gul ke gulābī gāloṅ se
pyār kiyā nargis kī naśhīlī ākhoṅ se
pyār kiyā badlī kī raṅgīlī julphoṅ se
khulī chāṇdnī meṅ maine abhisār kiyā

thām liyā, sīne pe uchhaltī lahroṅ ko
jhūm uṭhā, bāhoṅ meṅ pakaṛ tūfānoṅ ko
chūm liyā, bijlī ke machalte hoṭhoṅ ko
lūṭ liyā maine mast ubhartī bahāroṅ ko
rāt kī dulhan kā maine siṅgār kiyā