తనివారఁ దిరువ నందలముసేవ నేఁడు
(॥పల్లవి॥)
తనివారఁ దిరువ నందలముసేవ నేఁడు
అనువుగా సేవించరో అమరులు ఋషులు
(॥తని॥)
యెదురుగాఁ గూచుండి యిద్దరు నందల మెక్కి
కదిసి మీఁదఁ బన్నాగము గట్టించి
ముదమున నొండొరులు మోములు చూచుకొంటా
యిదివో దేవులు దేవుఁ డేఁగేరు వీధులా
(॥తని॥)
చదురులమాఁటలు సతు లాడఁగా వింటా
వుదుటునఁ దమ యంగా లొరయఁగను
అద నెరిఁగి మోవుల నంతలో నవ్వులు నవ్వి
యెదు రెదుర దంపతు లేఁగేరు వీధులా
(॥తని॥)
పొదిగి యలమేల్మంగ పూఁచి కాఁగిలించఁగాను
కదలక కూడీ శ్రీవెంకటేశ్వరుఁడు
అదివో యాతఁడు మెచ్చె నాతని నాపె మెచ్చె
యెదిగి నగరిలోనె యేఁగేరు వీధులా
(||pallavi||)
tanivāram̐ diruva naṁdalamuseva nem̐ḍu
anuvugā seviṁcharo amarulu ṛṣhulu
(||tani||)
yĕdurugām̐ gūsuṁḍi yiddaru naṁdala mĕkki
kadisi mīm̐dam̐ bannāgamu gaṭṭiṁchi
mudamuna nŏṁḍŏrulu momulu sūsugŏṁṭā
yidivo devulu devum̐ ḍem̐geru vīdhulā
(||tani||)
sadurulamām̐ṭalu sadu lāḍam̐gā viṁṭā
vuduḍunam̐ dama yaṁgā lŏrayam̐ganu
ada nĕrim̐gi movula naṁtalo navvulu navvi
yĕdu rĕdura daṁpadu lem̐geru vīdhulā
(||tani||)
pŏdigi yalamelmaṁga pūm̐si kām̐giliṁcham̐gānu
kadalaga kūḍī śhrīvĕṁkaḍeśhvarum̐ḍu
adivo yādam̐ḍu mĕchchĕ nādani nābĕ mĕchchĕ
yĕdigi nagarilonĕ yem̐geru vīdhulā