నిండు సోబనము నేఁడు నెయ్యపు దంపతులకు
(॥పల్లవి॥)
నిండు సోబనము నేఁడు నెయ్యపు దంపతులకు
మెండుగ నారతులెత్తి మీఁద సేసచల్లరే
(॥నిండు॥)
కట్టుఁడు కలువడాలు ఘనమైన తోరణాలు
గట్టిగాఁ బట్టణము సింగారించరే
కిట్టి రుక్మిణిదేవిఁ గృష్ణుఁడు పెండ్లాడి వచ్చె
పెట్టుఁ డిందరికి నేఁడు పెండ్లి విడేలు
(॥నిండు॥)
పాడరె సోబనాలు పై పై నె పేరఁటాండ్లు
యీ డా డనక వీధు లేఁగించరే
జాడతో వాయించరె పంచమహావాయిద్యాలు
యీడనె పెండ్లికట్నా లియ్యరె యిద్దరికి
(॥నిండు॥)
పొత్తుల విందులు దెచ్చి బువ్వమున నిడరే
హత్తి గంధాక్షత లీరె అందరు నేఁడు
నిత్తెమై శ్రీ వెంకటాద్రి నిలయుఁ డీ కృష్ణుఁడు
తత్తరాన నీకెఁ గూడె దగ్గరి సేవించరే
(||pallavi||)
niṁḍu sobanamu nem̐ḍu nĕyyabu daṁpadulagu
mĕṁḍuga nāradulĕtti mīm̐da sesasallare
(||niṁḍu||)
kaṭṭum̐ḍu kaluvaḍālu ghanamaina toraṇālu
gaṭṭigām̐ baṭṭaṇamu siṁgāriṁchare
kiṭṭi rukmiṇidevim̐ gṛṣhṇum̐ḍu pĕṁḍlāḍi vachchĕ
pĕṭṭum̐ ḍiṁdarigi nem̐ḍu pĕṁḍli viḍelu
(||niṁḍu||)
pāḍarĕ sobanālu pai pai nĕ peram̐ṭāṁḍlu
yī ḍā ḍanaga vīdhu lem̐giṁchare
jāḍado vāyiṁcharĕ paṁchamahāvāyidyālu
yīḍanĕ pĕṁḍligaṭnā liyyarĕ yiddarigi
(||niṁḍu||)
pŏttula viṁdulu dĕchchi buvvamuna niḍare
hatti gaṁdhākṣhada līrĕ aṁdaru nem̐ḍu
nittĕmai śhrī vĕṁkaḍādri nilayum̐ ḍī kṛṣhṇum̐ḍu
tattarāna nīgĕm̐ gūḍĕ daggari seviṁchare