నెప్పున ధర్మపుణ్యము నీచేతి దింతే
(॥పల్లవి॥)
నెప్పున ధర్మపుణ్యము నీచేతి దింతే
యెప్పుడు గాచినఁ గావు మింతా నీచిత్తము
(॥నెప్పు॥)
యేవల నరుఁడు లేక యెద్దే తా దున్నునా
నీవు సేయించక వేరే నేఁ బుణ్యము సేసేనా
దేవుఁడ సూర్యుఁడు రాక తెల్లవారునా రేయి
వేవేగ నీకృపఁగాక విజ్ఞానినౌదునా
(॥నెప్పు॥)
కుమ్మరవాఁడు లేకే కుండ రాఁ బుట్టునా
నెమ్మి నీవు పుట్టించక నేనే పుట్టితినా
వమ్ముల రాట్నము నిలువక గుండ్రలు నిల్చునా
పమ్మి నీయప్పణ లేక భవములు మానునా
(॥నెప్పు॥)
మక్కువ మగఁడులేని మనువు గలుగునా
లెక్కించి యంతర్యామివి లేని నే నున్నాఁడనా
చక్కఁగ శ్రీవేంకటేశ శరణనే బుద్ధి నాకు
తక్కక నీవియ్యకుంటే దాసుడ నే నౌదునా
(||pallavi||)
nĕppuna dharmabuṇyamu nīsedi diṁte
yĕppuḍu gāsinam̐ gāvu miṁtā nīsittamu
(||nĕppu||)
yevala narum̐ḍu lega yĕdde tā dunnunā
nīvu seyiṁchaga vere nem̐ buṇyamu sesenā
devum̐ḍa sūryum̐ḍu rāga tĕllavārunā reyi
vevega nīkṛpam̐gāga vijñāninaudunā
(||nĕppu||)
kummaravām̐ḍu lege kuṁḍa rām̐ buṭṭunā
nĕmmi nīvu puṭṭiṁchaga nene puṭṭidinā
vammula rāṭnamu niluvaga guṁḍralu nilsunā
pammi nīyappaṇa lega bhavamulu mānunā
(||nĕppu||)
makkuva magam̐ḍuleni manuvu galugunā
lĕkkiṁchi yaṁtaryāmivi leni ne nunnām̐ḍanā
sakkam̐ga śhrīveṁkaḍeśha śharaṇane buddhi nāgu
takkaga nīviyyaguṁṭe dāsuḍa ne naudunā