మఱి యే పురుషార్థము మా వంక లేదు మీకు
(॥పల్లవి॥)
మఱి యే పురుషార్థము మా వంక లేదు మీకు
అఱువడము మా కెంత అత్తువో నీవు
(॥మఱి॥)
హరి నీవు నాకు నంతర్యామివైన ఫలము
తిరిగినందే మా వెంటఁ దిరిగెదవు
ఇరవుగ నీవు మాకు నేలికవైన ఫలము
గరిమె మా పాపమెల్లఁ గట్టుకొంటివి
(॥మఱి॥)
భువిలోన నీవు నన్నుఁ బుట్టించిన ఫలము
ఇవల రక్షించే తొడుసిదొకటాయ
తివిరి నన్ను నీకుక్షిఁ దెచ్చిడుకొన్నఫలము
జవళి నా నేరములు చక్కఁబెట్టఁబడెను
(॥మఱి॥)
గారవాన నన్ను వెనక వేసుకొన్న ఫలము
చేరి నన్ను బుణ్యునిఁగాఁ జేయవలసె
ఆరసి నాకుఁ బ్రత్యక్షమైన ఫలమున నన్ను
యీరీతి శ్రీవేంకటేశ ఇముడుకోఁబడెను
(||pallavi||)
maṟi ye puruṣhārdhamu mā vaṁka ledu mīgu
aṟuvaḍamu mā kĕṁta attuvo nīvu
(||maṟi||)
hari nīvu nāgu naṁtaryāmivaina phalamu
tiriginaṁde mā vĕṁṭam̐ dirigĕdavu
iravuga nīvu māgu neligavaina phalamu
garimĕ mā pābamĕllam̐ gaṭṭugŏṁṭivi
(||maṟi||)
bhuvilona nīvu nannum̐ buṭṭiṁchina phalamu
ivala rakṣhiṁche tŏḍusidŏgaḍāya
tiviri nannu nīgukṣhim̐ dĕchchiḍugŏnnaphalamu
javaḽi nā neramulu sakkam̐bĕṭṭam̐baḍĕnu
(||maṟi||)
gāravāna nannu vĕnaga vesugŏnna phalamu
seri nannu buṇyunim̐gām̐ jeyavalasĕ
ārasi nāgum̐ bratyakṣhamaina phalamuna nannu
yīrīdi śhrīveṁkaḍeśha imuḍugom̐baḍĕnu