(॥పల్లవి॥)
మచ్చికఁ బందిలి వెట్టే మాయకాఁడ
కుచ్చితపు నేరుపుల కుశీలికాఁడ
(॥మచ్చి॥)
పలుకునయమె కాని పస లేదు నేస్తము
వలపులబేరాల వన్నెకాఁడ
మొలకనవ్వులె కాని మోహ మెరఁగ రాదు
నిలువు రాజసముల నీటుకాఁడ
(॥మచ్చి॥)
దవ్వులపొందె కాని దగ్గరఁగ నెడ లేదు
జవ్వనపుమదముల జాణకాఁడ
పువ్వులవాట్లె కాని పొరపొచ్చము మానవు
రవ్వలసరముల రాయడికాఁడ
(॥మచ్చి॥)
తమకపుఁ జూపె కాని తలఁపు దెలియ నీవు
అమరినరతులలో ఆసోదకాఁడ
క్రమమున నన్ను శ్రీవెంకటనాథ నీవె కూడి
భ్రమయించి తౌర వోరి పంతగాఁడా
(||pallavi||)
machchigam̐ baṁdili vĕṭṭe māyagām̐ḍa
kuchchidabu nerubula kuśhīligām̐ḍa
(||machchi||)
palugunayamĕ kāni pasa ledu nestamu
valabulaberāla vannĕgām̐ḍa
mŏlaganavvulĕ kāni moha mĕram̐ga rādu
niluvu rājasamula nīḍugām̐ḍa
(||machchi||)
davvulabŏṁdĕ kāni daggaram̐ga nĕḍa ledu
javvanabumadamula jāṇagām̐ḍa
puvvulavāṭlĕ kāni pŏrabŏchchamu mānavu
ravvalasaramula rāyaḍigām̐ḍa
(||machchi||)
tamagabum̐ jūbĕ kāni talam̐pu dĕliya nīvu
amarinaradulalo āsodagām̐ḍa
kramamuna nannu śhrīvĕṁkaḍanātha nīvĕ kūḍi
bhramayiṁchi taura vori paṁtagām̐ḍā