വെള്ളിലക്കിങ്ങിണി താഴ്‌വരയില്‍
വെള്ളാമ്പല്‍ പൊയ്കതന്‍ കല്‍പടവില്‍
തുള്ളിത്തുള്ളി കളിയാടി വന്നൊരു
ചെമ്മരിയാട്ടിന്‍ കുട്ടി
ചെമ്മരിയാട്ടിന്‍കുട്ടി (വെള്ളില)
ചോര മണത്തു മണത്തൊരു ചെന്നായ്‌
നീരാട്ടു കടവില്‍ വന്നു
അക്കരെ നില്‍ക്കും ആട്ടിന്‍ കുട്ടിയെ
ഇക്കരെ നിന്നു കൊതിച്ചു
ദാഹമടക്കാനുള്ളൊരു വെള്ളം
നീയെന്തിനായി കലക്കി?
ചെന്നായങ്ങനെ ഗര്‍ജ്ജിച്ചപ്പോള്‍
കുഞ്ഞു കിടാവു പറഞ്ഞു
തള്ളമരിച്ചൊരു ചെല്ലക്കുട്ടി
ചെയ്തിട്ടില്ലൊരു തെറ്റും
കൊല്ലരുതെന്നെ ഞാനൊരനാഥ
തള്ളരുതെന്നെ ഇരുളില്‍
ചെന്നായ്‌ നാവു നുണഞ്ഞു കുതിച്ചു
ചെമ്മരിയാടു പിടഞ്ഞു
വെള്ളാമ്പല്‍പൂ ഞെട്ടിയുലഞ്ഞു
വെള്ളിലക്കാടു കരഞ്ഞു (വെള്ളില)
