ఇదిగాన తన ధర్మ మించుకా వదలరాదు
(॥పల్లవి॥)
ఇదిగాన తన ధర్మ మించుకా వదలరాదు
వుదుటున హరివారై వుండవలెఁ గాని
(॥ఇది॥)
జాతిచండాలము దీరు జన్మాంతరములను
యేతులఁ గర్మచండాల మెన్నఁడూ బోదు
యీతల స్వర్గము చొరనియ్యకుండఁగాఁ ద్రిశంకుఁ-
డాతలఁ దాఁ బ్రతి స్వర్గమందు నున్నాఁ డదివో
(॥ఇది॥)
ఆస్తికులయినవారు అట్టె రామునిఁ గూడిరి
నాస్తికు లసురకుఁ బ్రాణము లిచ్చిరి
ఆస్తికనాస్తికుఁడై తా నం దెవ్వరివాఁడూఁ గాక
కస్తిఁబడి వాలి వృథాకలహానఁ బొలిసె
(॥ఇది॥)
యింక నొక్కటి గలదు యెదుటనే వుపాయము
అంకెల శ్రీవేంకటేశుఁడందే వున్నాఁడు
సంకెదీర నీతనికి శరణుచొచ్చి వరాలు
పొంకముగాఁ జేకొనేరు భూ జనులు నేఁడును
(||pallavi||)
idigāna tana dharma miṁchugā vadalarādu
vuduḍuna harivārai vuṁḍavalĕm̐ gāni
(||idi||)
jādisaṁḍālamu dīru janmāṁtaramulanu
yedulam̐ garmasaṁḍāla mĕnnam̐ḍū bodu
yīdala svargamu sŏraniyyaguṁḍam̐gām̐ driśhaṁkum̐-
ḍādalam̐ dām̐ bradi svargamaṁdu nunnām̐ ḍadivo
(||idi||)
āstigulayinavāru aṭṭĕ rāmunim̐ gūḍiri
nāstigu lasuragum̐ brāṇamu lichchiri
āstiganāstigum̐ḍai tā naṁ dĕvvarivām̐ḍūm̐ gāga
kastim̐baḍi vāli vṛthāgalahānam̐ bŏlisĕ
(||idi||)
yiṁka nŏkkaḍi galadu yĕduḍane vubāyamu
aṁkĕla śhrīveṁkaḍeśhum̐ḍaṁde vunnām̐ḍu
saṁkĕdīra nīdanigi śharaṇusŏchchi varālu
pŏṁkamugām̐ jegŏneru bhū janulu nem̐ḍunu