(॥పల్లవి॥)
గోవిందుదాసులమై కొన కెక్కుదుముఁ గాక
వేవేలు విధుల నమ్మి వెతఁబడఁగలమా
(॥గోవిం॥)
మనసు లోపలి మామర్మము దెలియలేము
ఘనుఁడైన హరి నెట్టు గానఁగలము
తనువుతో భోగాలు తగులు వీఁడగలేము
వెనక కర్మపాశాలు వీడించుకోఁగలమా
(॥గోవిం॥)
వడిఁ బెట్టే యింద్రియాల వద్దని మానుపలేము
తొడరి సంసారము తోయఁగలమా
బడిబడి నానాటి బతుకు చెప్పుకోలేము
పొడలేటి యితరుల బోధించఁగలమా
(॥గోవిం॥)
కొంకక ఆడిన మాట గురుతు వెట్టఁగలేము
లంకె వేదవాక్యము దలఁచఁగలమా
యింకా శ్రీవేంకటేశుఁ డితఁడే మా దేవుఁడని
సంకెలేకుందుముఁ గాక జాలిఁబడఁగలమా
(||pallavi||)
goviṁdudāsulamai kŏna kĕkkudumum̐ gāga
vevelu vidhula nammi vĕdam̐baḍam̐galamā
(||goviṁ||)
manasu lobali māmarmamu dĕliyalemu
ghanum̐ḍaina hari nĕṭṭu gānam̐galamu
tanuvudo bhogālu tagulu vīm̐ḍagalemu
vĕnaga karmabāśhālu vīḍiṁchugom̐galamā
(||goviṁ||)
vaḍim̐ bĕṭṭe yiṁdriyāla vaddani mānubalemu
tŏḍari saṁsāramu toyam̐galamā
baḍibaḍi nānāḍi badugu sĕppugolemu
pŏḍaleḍi yidarula bodhiṁcham̐galamā
(||goviṁ||)
kŏṁkaga āḍina māḍa gurudu vĕṭṭam̐galemu
laṁkĕ vedavākyamu dalam̐sam̐galamā
yiṁkā śhrīveṁkaḍeśhum̐ ḍidam̐ḍe mā devum̐ḍani
saṁkĕleguṁdumum̐ gāga jālim̐baḍam̐galamā