Ashi Kashi Vedi Maya

अशी कशी वेडी माया
तिला क्षितिजच नसे
आहे-नाहीच्या पल्याड
तिला वेगळेच दिसे

वेड्या मायेच्या छातीत
वेडा पाझरतो पान्हा
एका एका श्वासामध्ये
खोल हाकारतो कान्हा
कधी आसवांचे देणे
कधी रक्ताचे उसासे
आहे-नाहीच्या पल्याड
तिला वेगळेच दिसे

लागे नजरेला लळा
राही खिळूनिया अशी
जरा बोबड्या बोलाशी
जरा पळत्या पायाशी
काय लागला हा लळा
कसे लागले हे पिसे
आहे-नाहीच्या पल्याड
तिला वेगळेच दिसे