Pirannaal inn pirannaal

പിറന്നാള്‍ ഇന്ന് പിറന്നാള്‍
പ്രിയദര്‍ശിനിയാം പൌര്‍ണമിപ്പെണ്ണിനു
പതിനേഴു തികയുന്ന തിരുനാള്‍
(പിറന്നാള്‍)

മഞ്ജു പീതാംബരം ഞൊറിഞ്ഞുടുത്തു
മൃഗമദം ചാലിച്ച് തൊട്ടു - നെറ്റിയില്‍
മൃഗമദം ചാലിച്ച് തൊട്ടു (മഞ്ജു)
പൂമുഖപ്പടിയില്‍ പൊന്നും കിണ്ടിയില്‍
സോമരസം പകര്‍ന്നു വെച്ചു
(പിറന്നാള്‍)

ഭൂമിയിലെ പൂക്കളും മാനത്തെ പൂക്കളും
പിറന്നാളുണ്ണാന്‍ ചെന്നു (ഭൂമിയിലെ)
ചന്ദനപ്പലകകള്‍ ഇരിക്കാന്‍ കൊടുത്തു
സ്വര്‍ണ്ണത്തളികയില്‍ ചോറു കൊടുത്തു
(പിറന്നാള്‍)

പന്തലിലിരുന്നവര്‍ പിരിയും മുന്‍പേ
ചന്ദ്രഗ്രഹണം തുടങ്ങി - വീട്ടില്‍
ചന്ദ്രഗ്രഹണം തുടങ്ങി
രാജീവപുഷ്പസഖി മിഴിപൊത്തി
രാജീവപുഷ്പസഖി മിഴിപൊത്തി
രാഹു കേതുക്കള്‍ ഫണമുയര്‍ത്തി
(പിറന്നാള്‍)