പ്രാവുകള്‍ കുറുകുന്നു മനസ്സില്‍
പ്രണയം മുറുകുന്നു
മൂകവിഷാദത്തിന്‍ താഴ്വാരങ്ങളില്‍
മുന്തിരിവള്ളികള്‍ പൂക്കുന്നു
പറന്നുപോയൊരു പക്ഷിയുപേക്ഷിച്ച
തൂവലായ് നീയിരിക്കുന്നു
മഞ്ഞില്‍ നനഞ്ഞും മഴയില്‍ കുതിര്‍ന്നും
മാറോടു ചേര്‍ത്തുഞാന്‍ നില്‍ക്കുന്നു നിന്നെ
മനസ്സോടൂചേര്‍ത്തു ഞാന്‍ നില്‍ക്കുന്നു
ഉടഞ്ഞുപോയൊരു ശംഖിലുലാവുന്ന
നോവുമായ് നീയുറങ്ങുന്നു
കാറ്റില്‍ നനഞ്ഞും കനവിലലിഞ്ഞും
കണ്ണീരുമായിനീ തേങ്ങുന്നു നിന്നെ
കരളോടു ചേര്‍ത്തു ഞാന്‍ പാടുന്നു
