ഹാ ചിറകുകളൊടിഞ്ഞു തകര്‍ന്നു വീഴുന്നു ഞാന്‍
ചിരവിരഹ ഖിന്നയാമെന്‍ ശ്യാമഭൂമികേ
ഹാ തവവിമല ദലമൃദുല പര്യങ്കമേറി
ഈ തളരുമൊരു ജീവന്‍ സമാശ്വസിക്കട്ടെയോ?(2)
മാനവഹൃദയത്തിന്‍ നൊമ്പരമറിയാതെ
മാനവും ഭൂമിയും പുഞ്ചിരിച്ചു
മറ്റൊരുപുലരി വന്നുദിച്ചു
മൊട്ടുകള്‍ വീണ്ടും കണ്മിഴിച്ചു
സ്നേഹത്തിന്‍ പാലാഴി മുന്നില്‍ തുളുമ്പി
ദാഹിച്ചുവലയുന്നു മാനസം
(മാനവഹൃദയത്തിന്‍...)
മാരിവില്‍ പൂക്കുന്നു വീണ്ടും മായുന്നൂ
മഴമുകില്‍ പാവം കേഴുന്നു ചുറ്റും
അരഞൊടിമാത്രം തന്മധു പാത്രം
വീണ്ടൂംനിറയ്ക്കുന്നു പൂര്‍ണേന്ദു വിണ്ണില്‍
(മാനവഹൃദയത്തിന്‍...)
ഇന്നലെ കണ്ട പൂവിന്‍ ചിതയില്‍
ഇന്നത്തെ മലര്‍മൊട്ടിന്‍ മധുരനൃത്തം
ഇന്നലെ കണ്ട.....
സ്നേഹത്തിന്‍ പാലാഴിമുന്നില്‍ തുളുമ്പി
ദാഹിച്ചുവലയുന്നു മാനസം
(മാനവ ഹൃദയത്തിന്‍...)
