അനുപമകൃപാനിധി,യഖിലബാന്ധവൻ ശാക്യ-
ജിനദേവൻ, ധർമ്മരശ്മി ചൊരിയും നാളിൽ,
ഉത്തരമഥുരാപുരിക്കുത്തരോപാന്തത്തിലുള്ള
വിസ്തൃതരാജവീഥിതൻ കിഴക്കരികിൽ,
കാളിമകാളും നഭസ്സെയുമ്മവെയ്ക്കും വെൺമനോജ്ഞ-
മാളികയൊന്നിന്റെ തെക്കേ മലർമുറ്റത്തിൽ,
വ്യാളീമുഖം വച്ചു തീർത്ത വളഞ്ഞ വാതിലാർന്നക-
ത്താളിരുന്നാൽ കാണും ചെറുമതിലിനുള്ളിൽ,
ചിന്നിയ പൂങ്കുലകളാം പട്ടുതൊങ്ങൽ ചൂഴുമൊരു
പൊന്നശോകം വിടർത്തിയ കുടതൻ കീഴിൽ,
മസൃണശിലാസനത്തിൻ ചെരിഞ്ഞ പാർശ്വത്തിൽ പുഷ്പ-
വിസൃമരസുരഭിയാമുപധാനത്തിൽ,
മെല്ലെയൊട്ടു ചാഞ്ഞും വക്കിൽ കസവുമിന്നും പൂവാട
തെല്ലളകോപരിയൊരു വശത്താക്കിയും,
കല്ലൊളിവീശുന്ന കർണ്ണപൂരമാർന്നും, വിടരാത്ത
മുല്ലമാല ചിന്നും കൂന്തൽക്കരിവാർമുകിൽ
ഒട്ടു കാണുമാറുമതിന്നടിയിൽ നന്മൃഗമദ-
പ്പൊട്ടിയന്ന മുഖചന്ദ്രൻ സ്ഫുരിക്കുമാറും,
ലോലമോഹനമായ്ത്തങ്കപ്പങ്കജത്തെ വെല്ലും വലം-
കാലിടത്തു തുടക്കാമ്പിൽ കയറ്റിവച്ചും,
രാമച്ചവിശറി പനീനീരിൽ മുക്കിത്തോഴിയെക്കൊ-
ണ്ടോമൽക്കൈവള കിലുങ്ങെയൊട്ടു വീശിച്ചും,
കഞ്ജബാണൻതന്റെ പട്ടംകെട്ടിയ രാജ്ഞിപോലൊരു
മഞ്ജുളാംഗിയിരിക്കുന്നു മതിമോഹിനി.
anubamakṛpānidhi,yakhilabāndhavan śākya-
jinadevan, dharmmaraśmi sŏriyuṁ nāḽil,
uttaramathurāburikkuttarobāndattiluḽḽa
vistṛtarājavīthidan kiḻakkarigil,
kāḽimagāḽuṁ nabhassĕyummavĕykkuṁ vĕṇmanojña-
māḽigayŏnninṟĕ tĕkke malarmuṭrattil,
vyāḽīmukhaṁ vaccu tīrtta vaḽañña vādilārnnaga-
ttāḽirunnāl kāṇuṁ sĕṟumadilinuḽḽil,
sinniya pūṅgulagaḽāṁ paṭṭudŏṅṅal sūḻumŏru
pŏnnaśogaṁ viḍarttiya kuḍadan kīḻil,
masṛṇaśilāsanattin sĕriñña pārśvattil puṣpa-
visṛmarasurabhiyāmubadhānattil,
mĕllĕyŏṭṭu sāññuṁ vakkil kasavuminnuṁ pūvāḍa
tĕllaḽagobariyŏru vaśattākkiyuṁ,
kallŏḽivīśunna karṇṇabūramārnnuṁ, viḍarātta
mullamāla sinnuṁ kūndalkkarivārmugil
ŏṭṭu kāṇumāṟumadinnaḍiyil nanmṛgamada-
ppŏṭṭiyanna mukhasandran sphurikkumāṟuṁ,
lolamohanamāyttaṅgappaṅgajattĕ vĕlluṁ valaṁ-
kāliḍattu tuḍakkāmbil kayaṭrivaccuṁ,
rāmaccaviśaṟi panīnīril mukkittoḻiyĕkkŏ-
ṇḍomalkkaivaḽa kiluṅṅĕyŏṭṭu vīśiccuṁ,
kañjabāṇantanṟĕ paṭṭaṁkĕṭṭiya rājñibolŏru
mañjuḽāṁgiyirikkunnu madimohini.