बांधते मन हळव्या गाठी
गुंतणे जरी नसते हाती
कधी कसे सूर जुळती आणि
भावते मग कुठले कुणी
हरवते जग नकळत सारे
हवेहवेसे कुणीतरी वाटे
सांग ना जीव झुरतो का रे
साजणा रे, साजणा रे
हा गंध आहे तुझा
की छंद लागे तुझा
धुंदावलेल्या स्पंदनांना
भांबावले मी कधी
समजावले मी कधी
नादावलेल्या पावलांना
ऐकुनी साद तू येशील का
साथ जन्मांची देशील का
हात हाती घेऊनि माझा
रंग स्वप्नांना देशील का
अनोळखी जग अवघे होते
उमलुनी मन हळवे गाते
सांग ना जीव झुरतो का रे
साजणा रे, साजणा रे
कळले मला ना कधी
होऊन गेले तुझी
स्वप्नी तुझे मी रंग ल्याले
एकांत माझा तुझा
का सांग झाला मुका
का भावनांना पंख आले
स्पर्श का रोमांचित झाले
श्वास ही गंधाळुन गेले
खेळ हा रात्रंदिन चाले
सारखा भासांचा का रे
बहरले जरी तनमन सारे
लागली तरी हुरहुर का रे
सांग ना जीव झुरतो का रे
साजणा रे, साजणा रे