रक्तामध्ये ओढ मातीची, मनास मातीचे ताजेपण
मातीतून मी आले वरती, मातीचे मम अधुरे जीवन
कोसळताना वर्षा अविरत, स्नान समाधीमध्ये डुबावे
दवांत भिजल्या प्राजक्तापरी ओल्या शरदामधी निथळावे
हेमंताचा ओढून शेला हळूच ओले अंग टिपावे
वसंतातले फुलाफुलांचे छापील उंची पातळ ल्यावे
ग्रीष्माची नाजूक टोपली, उदवावा कचभार तिच्यावर
जर्द विजेचा मत्त केवडा तिरकस माळावा वेणीवर
आणिक तुझिया लाख स्मृतींचे खेळवित मग रात काजवे
उभे राहुनी असे अधांतरी, तुजला ध्यावे, तुजला ध्यावे
raktāmadhye oḍh mātīchī, manās mātīche tājepaṇ
mātītūn mī āle vartī, mātīche mam adhure jīvan
kosaḻtānā varṣhā avirat, snān samādhīmadhye ḍubāve
davāṅt bhijalyā prājaktāprī olyā śhardāmdhī nithḻāve
hemaṅtāchā oḍhūn śhelā haḻūch ole aṅg ṭipāve
vasaṅtātle phulāphulāṅche chhāpīl uṅchī pātaḻ lyāve
grīṣhmāchī nājūk ṭoplī, udvāvā kachbhār tichyāvar
jard vijechā matt kevḍā tirkas māḻāvā veṇīvar
āṇik tujhiyā lākh smṛtīṅche kheḻvit mag rāt kājve
ubhe rāhunī ase adhāṅtrī, tujlā dhyāve, tujlā dhyāve