चैत्रमास, त्यांत शुद्ध नवमी ही तिथी
गंधयुक्त तरिहि वात उष्ण हे किती
दोन प्रहरी का गं शिरीं सूर्य थांबला ?
राम जन्मला गं सखी राम जन्मला
कौसल्याराणि हळूं उघडि लोचनें
दिपुन जाय माय स्वतः पुत्रदर्शनें
ओघळले आंसु, सुखे कंठ दाटला
राजगृहीं येई नवी सौख्य पर्वणी
पान्हावुन हंबरल्या धेनू अंगणी
दुंदुभिचा नाद तोच धुंद कोंदला
पेंगुळल्या आतपांत जागत्या कळ्या
'काय काय' करित पुन्हा उमलल्या खुळ्या
उच्चरवें वायू त्यांस हसून बोलला
वार्ता ही सुखद जधीं पोंचली जनी
गेहांतुन राजपथी धावले कुणी
युवतींचा संघ एक गात चालला
पुष्पांजली फेकी कुणी, कोणी भूषणे
हास्याने लोपविले शब्द, भाषणे
वाद्यांचा ताल मात्र जलद वाढला
वीणारव नूपुरांत पार लोपले
कर्ण्याचे कंठ त्यात अधिक तापले
बावरल्या आम्रशिरीं मूक कोकिला
दिग्गजही हलुन जरा चित्र पाहती
गगनांतुन आज नवे रंग पोहती
मोत्यांचा चूर नभी भरुन राहिला
बुडुनि जाय नगर सर्व नृत्यगायनी
सूर, रंग, ताल यात मग्न मेदिनी
डोलतसे ती ही, जरा शेष डोलला
chaitrmās, tyāṅt śhuddh navmī hī tithī
gaṅdhyukta tarihi vāt uṣhṇ he kitī
don prahrī kā gaṅ śhirīṅ sūry thāṅblā ?
rām janmlā gaṅ sakhī rām janmlā
kausalyārāṇi haḻūṅ ughḍi lochneṅ
dipun jāy māy svatḥa putrdarśhneṅ
oghaḻle āṅsu, sukhe kaṅṭh dāṭlā
rājgṛhīṅ yeī navī saukhy parvṇī
pānhāvun haṅbaralyā dhenū aṅgṇī
duṅdubhichā nād toch dhuṅd koṅdlā
peṅguḻlyā ātpāṅt jāgatyā kaḻyā
'kāy kāy' karit punhā umalalyā khuḻyā
uchcharveṅ vāyū tyāṅs hasūn bollā
vārtā hī sukhad jadhīṅ poṅchlī janī
gehāṅtun rājapthī dhāvle kuṇī
yuvtīṅchā saṅgh ek gāt chāllā
puṣhpāṅjlī phekī kuṇī, koṇī bhūṣhṇe
hāsyāne lopvile śhabd, bhāṣhṇe
vādyāṅchā tāl mātr jalad vāḍhlā
vīṇārav nūpurāṅt pār lople
karṇyāche kaṅṭh tyāt adhik tāple
bāvralyā āmrśhirīṅ mūk kokilā
diggajhī halun jarā chitr pāhtī
gagnāṅtun āj nave raṅg pohtī
motyāṅchā chūr nabhī bharun rāhilā
buḍuni jāy nagar sarv nṛtygāynī
sūr, raṅg, tāl yāt magna medinī
ḍolatse tī hī, jarā śheṣh ḍollā