श्रीगुरु चरण सरोज रज, निज मनु मुकुर सुधारि
बरनउँ रघुवर बिमल जसु, जो दायकु फल चारि
बुद्धिहीन तनु जानिके, सुमिरौं पवन-कुमारा
बल बुद्धि विद्या देहु मोहिं, हरहु कलेश विकारा
जय हनुमान ज्ञान गुन सागर
जय कपीस तिहुँ लोक उजागर
राम दूत अतुलित बल धामा
अंजनि पुत्र पवनसुत नामा
महाबीर बिक्रम बजरंगी
कुमति निवार सुमति के संगी
कंचन बरन बिराज सुबेसा
कानन कुंडल कुँचित केसा
हाथ बज्र औ ध्वजा बिराजे
काँधे मूँज जनेऊ साजे
शंकर सुवन केसरी नंदन
तेज प्रताप महा जगवंदन
विद्यावान गुनी अति चातुर
राम काज करिबे को आतुर
प्रभु चरित्र सुनिबे को रसिया
राम लखन सीता मन बसिया
सूक्ष्म रूप धरि सियहि दिखावा
विकट रूप धरि लंक जरावा
भीम रूप धरि असुर सँहारे
रामचंद्र के काज सँवारे
लाय संजीवन लखन जियाए
श्रीरघुबीर हरषि उर लाए
रघुपति कीन्ही बहुत बड़ाई
तुम मम प्रिय भरतहि सम भाई
सहस बदन तुम्हरो जस गावै
अस कहि श्रीपति कंठ लगावै
सनकादिक ब्रह्मादि मुनीसा
नारद सारद सहित अहीसा
जम कुबेर दिगपाल जहाँ ते
कवि कोविद कहि सके कहाँ ते
तुम उपकार सुग्रीवहिं कीन्हा
राम मिलाय राज पद दीन्हा
तुम्हरो मंत्र बिभीषण माना
लंकेश्वर भये सब जग जाना
जुग सहस्त्र जोजन पर भानू
लिल्यो ताहि मधुर फ़ल जानू
प्रभु मुद्रिका मेलि मुख माहीं
जलधि लाँघि गए अचरज नाहीं
दुर्गम काज जगत के जेते
सुगम अनुग्रह तुम्हरे तेते
राम दुआरे तुम रखवारे
होत ना आज्ञा बिनु पैसारे
सब सुख लहैं तुम्हारी सरना
तुम रक्षक काहु को डरना
आपन तेज सम्हारो आपै
तीनों लोक हाँक तै कापै
भूत पिशाच निकट नहिं आवै
महावीर जब नाम सुनावै
नासै रोग हरे सब पीरा
जपत निरंतर हनुमत बीरा
संकट तै हनुमान छुडावै
मन क्रम वचन ध्यान जो लावै
सब पर राम तपस्वी राजा
तिन के काज सकल तुम साजा
और मनोरथ जो कोई लावै
सोई अमित जीवन फल पावै
चारों जुग परताप तुम्हारा
है परसिद्ध जगत उजियारा
साधु संत के तुम रखवारे
असुर निकंदन राम दुलारे
अष्ट सिद्धि नौ निधि के दाता
अस बर दीन जानकी माता
राम रसायन तुम्हरे पासा
सदा रहो रघुपति के दासा
तुम्हरे भजन राम को पावै
जनम जनम के दुख बिसरावै
अंतकाल रघुवरपुर जाई
जहाँ जन्म हरिभक्त कहाई
और देवता चित्त ना धरई
हनुमत सेई सर्व सुख करई
संकट कटै मिटै सब पीरा
जो सुमिरै हनुमत बलबीरा
जय जय जय हनुमान गोसाई
कृपा करहु गुरुदेव की नाई
जो सत बार पाठ कर कोई
छूटहिं बंदि महा सुख होई
जो यह पढ़ै हनुमान चालीसा
होय सिद्धि साखी गौरीसा
तुलसीदास सदा हरि चेरा
कीजै नाथ हृदय महा डेरा
पवनतनय संकट हरन, मंगल मूरति रूप
राम लखन सीता सहित, हृदय बसहु सुर भूप
śhrīguru charaṇ saroj raj, nij manu mukur sudhāri
baranuṇ raghuvar bimal jasu, jo dāyku phal chāri
buddhihīn tanu jānike, sumirauṅ pavan-kumārā
bal buddhi vidyā dehu mohiṅ, harhu kaleśh vikārā
jay hanumān jñān gun sāgar
jay kapīs tihuṇ lok ujāgar
rām dūt atulit bal dhāmā
aṅjni putr pavansut nāmā
mahābīr bikram bajaraṅgī
kumti nivār sumti ke saṅgī
kaṅchan baran birāj subesā
kānan kuṅḍal kuṇchit kesā
hāth bajr au dhvjā birāje
kāṇdhe mūṇj janeū sāje
śhaṅkar suvan kesrī naṅdan
tej prtāp mahā jagavaṅdan
vidyāvān gunī ati chātur
rām kāj karibe ko ātur
prbhu charitr sunibe ko rasiyā
rām lakhan sītā man basiyā
sūkṣhm rūp dhari siyhi dikhāvā
vikaṭ rūp dhari laṅk jarāvā
bhīm rūp dhari asur sṇhāre
rāmchaṅdr ke kāj sṇvāre
lāy saṅjīvan lakhan jiyāe
śhrīrghubīr harṣhi ur lāe
raghupti kīnhī bahut baṛāī
tum mam priy bharathi sam bhāī
sahas badan tumhro jas gāvai
as kahi śhrīpti kaṅṭh lagāvai
sankādik brahmādi munīsā
nārad sārad sahit ahīsā
jam kuber digpāl jahāṇ te
kavi kovid kahi sake kahāṇ te
tum upkār sugrīvhiṅ kīnhā
rām milāy rāj pad dīnhā
tumhro maṅtr bibhīṣhaṇ mānā
laṅkeśhvar bhaye sab jag jānā
jug sahastr jojan par bhānū
lilyo tāhi madhur fal jānū
prbhu mudrikā meli mukh māhīṅ
jaldhi lāṇghi gae acharaj nāhīṅ
durgam kāj jagat ke jete
sugam anugrah tumhre tete
rām duāre tum rakhvāre
hot nā ājñā binu paisāre
sab sukh lahaiṅ tumhārī sarnā
tum rakṣhak kāhu ko ḍarnā
āpan tej samhāro āpai
tīnoṅ lok hāṇk tai kāpai
bhūt piśhāch nikaṭ nahiṅ āvai
mahāvīr jab nām sunāvai
nāsai rog hare sab pīrā
japat niraṅtar hanumat bīrā
saṅkaṭ tai hanumān chhuḍāvai
man kram vachan dhyān jo lāvai
sab par rām tapasvī rājā
tin ke kāj sakal tum sājā
aur manorath jo koī lāvai
soī amit jīvan phal pāvai
chāroṅ jug partāp tumhārā
hai parsiddh jagat ujiyārā
sādhu saṅt ke tum rakhvāre
asur nikaṅdan rām dulāre
aṣhṭ siddhi nau nidhi ke dātā
as bar dīn jānkī mātā
rām rasāyan tumhre pāsā
sadā raho raghupti ke dāsā
tumhre bhajan rām ko pāvai
janam janam ke dukh bisrāvai
aṅtkāl raghuvarpur jāī
jahāṇ janm haribhakt kahāī
aur devtā chitt nā dharaī
hanumat seī sarv sukh karaī
saṅkaṭ kaṭai miṭai sab pīrā
jo sumirai hanumat balbīrā
jay jay jay hanumān gosāī
kṛpā karhu gurudev kī nāī
jo sat bār pāṭh kar koī
chhūṭhiṅ baṅdi mahā sukh hoī
jo yah paṛhai hanumān chālīsā
hoy siddhi sākhī gaurīsā
tulsīdās sadā hari cherā
kījai nāth hṛday mahā ḍerā
pavantanay saṅkaṭ haran, maṅgal mūrti rūp
rām lakhan sītā sahit, hṛday bashu sur bhūp