Do din kee muhabbat men ham ne

do din kī muhabbat meṅ ham ne
kuchh khoyā hai kuchh pāyā hai
do ġham ke āṇsu ham ko mile
jīne kā chain gṇvāyā hai
do din kī muhabbat meṅ ham ne …

armāṇ haiṅ jo nīkle hī nahīṅ
kuchh āṇsū hai jo bahe nahīṅ
kuchh aise bhī afsāne haiṅ
jo ham ne kisī se kahe nahīṅ
kuchh hṇsī meṅ badle haiṅ āṅsū
aur apnā dard chhupāyā hai
do din kī muhabbat meṅ ham ne …

ai dil tū hameṅ taṛpātā thā
le ham ne rulāyā hai tujh ko
ai dil kī lagī tū jalātī thī
le ham ne jalāyā hai tujh ko
is dard ko vo jāne jis ne
ghar apnā kabhī jalāyā hai
do din kī muhabbat meṅ ham ne …

is bāt pe khuśh hai divānā
mere zakhm kisī ke kām āye
ek rog nayā ham le baiṭhe
k‌yā jāne kab ārām āye
ai dil itnā bedār na ho
jab ġham ko gale lagāyā hai
do din kī muhabbat meṅ ham ne …