Karavten badalte rahe saaree raat ham

karavṭeṅ badalte rahe sārī rāt ham, āp kī qasam
ġham na karo din judāī ke bahut haiṅ kam, āp kī qasam

yād tum āte rahe ik hūq sī uṭhtī rahī
nīṅd mujhse, nīṅd se maiṅ bhāgtī chhuptī rahī
rāt bhar bairan nigoṛī chāṇdnī chubhtī rahī
āg sī jaltī rahī, girtī rahī śhabnam, āp kī qasam …

jhīl kī āṇkhoṅ meṅ āśhiq ḍūb ke kho jāyegā
zulf ke sāye meṅ dil naġhmā bharā so jāyegā
tum chale jāo nahīṅ to kuchh na kuchh ho jāyegā
ḍagamgā jāyeṅge aise hāl meṅ qadam, āp kī qasam …

rūṭh jāyeṅ ham to tum hamko manā lenā sanam
dūr hoṅ to pās hamko tum bulā lenā sanam
kuchh gilā ho to gale hamko lagā lenā sanam
ṭūṭ na jāye kabhī ye pyār kī qasam, āp kī qasam …